LUK.15 Chapters LUK.17

लूका

16

चलहाँकय बराहील
1हेना वरि हेंय चेला कू थरेय कहनी तेडा, “ मियाँ होड़ धनमान धन सम्पति देख - रेख लगड बराहीलीय रखो तेडा। हेंय बराहील रा: बारे ते होड़कू धन सम्पति तमिय उड़ो यडा मेनते धनमान कू लाय वडा। 2तहाँ धनमान बराहीलीय राः केडियतेय होंबोर तेडिया, “ नआँ ची घिया: टेबो: हवे, इंञ अम बिसेय तेंञ अँजोम यडा ? अपन सींड़ काम रा: हिसाब - कितब मी ओवाञू, कहेकि अम इंञ थरे बराहीलु: एरोम दोहो सको एना।
3हेना वरि बराहील पसींद तेडा, ‘अब इंञ चींञ बनोआँ ? मालिकींञ बराहील काम वरि होय उडुंग यडिञाँ। हास पोड़ा: लगड जँगाड़ींञ हो कोवाआ, अवुर असी जोमु: होंञ गेवुआ। 4इंञ जेर गोत्तेडंञु, इंञ चींञ ची: हेना, इंञ बराहील कमींञ बगीवा रेदो, होड़कू इंञ अपन ओड़ाः तेकू इदिञाँ कनारा जोमे लगड दोकू ओनोवाञाँ।’
5तहाँ हेंय अनेज मालिक थरे कू करजा तन हेंकू मियाँड होंड़ - मियाँड होंड़ तेय राः केड कुते मड़ाँगाअयीय होंबोर तेडा, “अम थरे मालिक रा: करजा तिमीन इदाना।” 6तहाँ हेंय कहनी तेडा, “ सव मन सुनुम, ” तहाँ बराहील हेंय थरेय कहनी तेडा, “ दुड़ूब को:ते अपन परची रे तुरेत ते पचास मेनतेम ओल गोत्ते।” 7हेना वरि एटागीय होंबोर तेडा, “ अम थरे तीमीन करजा इदाना ? हेंय कहनी तेडा, “ सव बोरा गोहोम, “ तहाँ बराहील हेंय थरेहोय कहनी तेडा, “ अपन परची रे तुरेत ते अस्सी बोरा गिआ मेनतेम ओल गोत्ते।”
8“ मालिक हेंय जलकट होड़ चलाकी तेय काम केडा मेनाआँ तेय बडेय वडिया। कहेकि नआँ दुनिया रेनकू अपन काम वरि निपटो: लगड भगवान रेनकू होड़कू वरि हो अखीर कू हुसियारा। 9इंञ अपे थरेंञ कहनी यडा, नआँ दुनिया रा: धन सम्पति ते, होड़कू पे मदद वते हेंकू अपन गति पे बनो कू। नआँ धन हनी: रे, सरग रे अपे खुसी तेकू सोवागत पेआ।
10" कनय हो दम भरा: टेबो: रे इमानदारिय दोहोन रेदो, हेंय बडेआ टेबो: रे हो इमानदारिय दोहोना। अवुर कनय हो दम भराः टेबो: रेय ठकलबरा: रेदो, हेंय बडेआ टेबो: रे होय ठकलबराआ। 11हेना ते अपे दुनिया रा: धन सम्पति रे मेने इमानदार पे दोहो गना, दो सरग रा: धन सम्पति अपे इया जिमा वापेआ ? 12अवुर अपे एटा: कुराः धन सम्पति रे इमानदार मेने पे दोहो गना, दो अपे लगड सरग रे इदान हेना इया ओवा पेआ ?
13“कनय हरवाह बा होड़ मालिक कींञ राः काम एरोय करो सको एना। कहेकि हेंय मियाँ होड़ सुदा परेमिय रखोआ, अवुर मियाँ होड़ एरोय बेस वडिया। अपे भगवान अवुर धन मियाँ मियाँ ते एरो पे सेवा सको एना।”
लोभिया फरीसी कू
(मत्ती 11:12-13)
14हेना वरि धन सम्पति रे भरोसा कू रखो तआ, हेंकू फरीसी कू नआँ टेबो: अँजोम केते ईसु कू मजाक तेडा। 15तहाँ ईसु हेंकू थरेय कहनी तेडा, “ अपे होड़कू मड़ंग रे बढ़ियाँ गिअंञ मेनते देखवटी पे तीबा। लेकिन भगवान अपे मन राः टेबो: घलीय पपाड़ीआ। नआँ दुनिया रेनकू होड़कू अखीर किमती गिआ मेनते कू पसींदेआ, हेना भगवान रा: नजेर रे बढ़ियाँ कोवाआ। 16भगवान रा: टेबो: लाय हेंकू अवुर मूसा ओवाडा नियम युहन्ना अँगम दोहो एना। हेन वरि भगवान रा: राज रा: बढ़ियाँ: खभेर लाय यडा, सींड़ कू हेना ते सेने लगड कू कोसिस यडा। 17अगस अवुर ओतेत मेटियोः सेथिया गिआ, लेकिन भगवान रा: टेबो: तेने मेन होडिंञाँ कनर चेका एरो मेटियो एना।
18अवुर कनय होड़ अनेज इंगत कू बगी वते एटागी होड़ीहोन सुदाय बियाहु: रेदो, हेंय सुदाय लसा फंदा। अवुर कनय बगीवयाय कोड़ीहोन सुदाय बियाहु: रेदो, हेंय हो हेंय सुदाय लसा फंदाआ।
धनी होड़ अवुर लाजर रा: उदाहरड़
19“मियाँ होड़ अखीर धनमानिय दोहो एना, हेंय महंगा - महंगा तआ, कपड़ाय तुसींञ दोहो एनु। अवुर रोज दिन मान मनिसय जोम लिंबड़ दोहोनु अवुर मवोज मस्ती तेय दोहोन दोहो एनु। 20हेनी दुवार रे मियाँ होड़ लाजर मेनते कू ञुमू तडिय हेनी, घाव तेय खलखँदर तन हेनी धनमान होड़ दुवर रेय दोहोन दोहो एनु। 21धनमान होड़ थाः सीत चिली तेय जोम कयासुः लगाडिय तरसो: दोहो एनु; अवुर कुतू कुहो हेंय घावतन हेना कू जड़ा: दोहो एनु।
22“एक दिन राः दिन रे गरीब होड़ गोज एना, अवुर बराहील कू हेंय जहाँ रे अबराहम दोहो एना सरग रेकू इदी तेडिया। हेंय धनी होड़ होय गोजेना, अवुर कू हर तेडिया। 23अवुर नरक रे हेंय अखीर हहस तेय तड़पोः दोहोएनु। हेन तोलोग सगींञ रे अबराहामीय ञेंल ञँमतेडा। अवुर अबराहम बंदेर रे लाजर होय ञेंल ञँमतेडिया। 24तहाँ हेंय हाक एना, ‘अबराहम अपा, इंञ थरे दयाः मी, अवुर लाजर अंगरीत लोहा केते अलाँगींञ रे दाःते तेय जोरो कयासींञ लगड मी कुल गोत्तेयू। कहेकि इंञ नआँ सेंगेल रेंञ तड़पो: तना।’
25“हेन तोलोग अबराहम कहनी तेडा, ‘ओ बाबु उहयारेमु, अम अपन जिनगी रे सुखे - सुख रेम दोहो एना, अवुर हेना तोलोग लाजर अखीर दु:ख रेय दोहो एना। नेय नआँ रे सान्ति तेया अवुर अम बिपेत रेमा। 26नआँ दु:ख छोड़ अलींञ अवुर अम मँझर रे अखीर बडेआ मियाँ टंग गहीरा डोडहा इदाना, हेना ते कनय हो नआँ वरि अम हन सेन गिसन कुरे दो, एरो कू सेन सको एना, न मेना वरि अलींञ थरे एरो कू मेज सकोआ।’
27“तहाँ धनमान कहनी तेडा, ‘हेंडे रेदो ओ अपा, अम थरेंञ अरजी: तना, अम मेय इंञ अपुंञ ओड़ाः हनतेम कुल गोत्तेयू। 28कहेकि पाँच झन मगंञ एडकू इदाना। हेंकू थरे सेन को:ते लाजर नआँ टेबोईय चेतवन कू, ताकि हेंकू दु:ख सहो: हेना जघा रे अलो कू मेजुऊ।’ 29हेना वरि अबराहम धनमान थरेय कहनी तेडा, ‘हेंकू थरे मूसा अवुर भगवान रा: टेबो: लाय हेंकू रा: कागद इदाना, हेंकू हेन कुराः कु अँजोमा।’ 30तहाँ धनमान कहनी तेडा, ‘कोवानू, अबराहीम अपा, अगर कनय मियाँ होड़ गोजको: वरि जियो को:ते हेंकू थरेय सेनु: रेदो, हेंकू अपन पाप राः माफी असी केते भगवान हनते कू मिड़ाआ।’ 31फेर अबराहीम हेंयीय कहनी वडा, ‘जब हेंकू मूसा अवुर भगवान रा: टेबो: लाय हेंकू राः मेने कू अँजोम यडा, दो गोजको: वरि जियो रिमको: कुरा: हो एरो कू अँजोम तेडा।’