लूका
5
ईसु चेला कुय चुनो तेडा
(मत्ती 4:18-22; मरकुस 1:16-20)
1एक दिन राः दिन रे ईसु गन्नेसरत
a रे अखीर लम्बा चवड़ाआ दाह अड़ी रेय चड़ाँ तन तोलोगू, होड़कू भगवान राः टेबोः अँजोम लगड कू ठेला ओड़ेंगू।
2हेना तोलोग हेंय बडेः दाह अड़ी रे बाटंग डोंगा कू चड़ाँ तडा हेनाय ञेंल ञँमतेडा, अवुर हकू ञेंड कू डोंगा वरि अगड़ू केनते जाल कू बुहल दोहो एनु।
3हेन तोलोग ईसु सिमोन राः डोंगा रे रकब केनते अड़ी वरि दम भर मँझर हनते गोगे लगाडीय कहनी तेडा। हेना वरि डोंगा रेय दुड़ूब केनते सिकछाय ओवाकू दोहो एनु।
4तहाँ हेंय टेबोः हनी केड राः बाद रे सिमोन थरेय कहनी तेडा, “ डोंगा गहीर गतर हनतेम इदीयू अवुर हकुकू बझहो लगड जाल मी अटाड़ू।” 5तहाँ सिमोन जबाब तेडा, “ ठिके इदाना गुरू, इंञ रात भरींञ ञेंञेड एना, हेंडे रेहो मेनेंञ ञेंडगड कुआ, लेकिन अम कहनी यड रेदो जालींञ अटड़ यडा।” 6हेना वरिय अटड़ तेड दो जाल घली ओडेजु: मेनमोट ते अखीर हकुकू बझहो एना। 7हेना वरि हेंय एटा: डोंगा रेनकू गतीत कुहो सयता एम लगाडीय इसारावड कुआ। तहाँ हेंकू मेजेना,
हेना वरि बनाटंग डोंगा हकुकू ते एतना कू पेरज तेडा डोंगा घली डूबो बंचो एना,।
8नआँ ञेंलकेते सिमोन पतरस ईसु कटा दुबी रेय ऊकड़ूम केनतेय कहनी तेडा, “ए परभु , इंञ बंदेर वरिम चलोऊ, इंञ दो पापी होड़ हवे।” 9तहाँ हेंय अवुर गतीत कू, अखीर हकुकू सबताडा ञेंल तेकू असचरज यनु । 10जबदी कोड़ा होपोन कींञ याकूब अवुर युहन्ना हो सिमोन सुदा कींञ दोहो एना, हेंकींञ होकींञ असचरज यनु । हेना वरि ईसु सिमोन थरेय कहनी तेडा, “ अलोम बोरू; अब वरि अम भगवान थरे होड़कुम आगा।” 11हेना वरि हेंकू डोंगा अड़ी रेकू अगतेडा, अवुर सींड़ चीज बगी वते ईसु सुदा कू चलो एना ।
कुड़गा रोगियाय चीकन तेडा
(मत्ती 8:1-4; मरकुस 1:40-45)
12जब ईसु मियाँ टंग सहर रेय दोहो एन तोलोग, हेना रे मियाँ होड़ कुड़गा रोगिया अखीर दोहो एन हेंय मेजेना, हेना वरि हेंय ईसु ञेंलकेते गोड़ीय गिरो केनतेय अरजी एना, “ओ परभु, अगर अम चोहो: रेदो इंञ मी सुध सकोआ ।” 13हेना वरि तीतिय सुहरू केते हेंयूय छुयों तेडिया, अवुरिय कहनी तेडा, “ इंञ चहो: तना चीकानु: मी ।” हेना वरि हेंय राः कुड़गा रोग तुरेत ते छुटो यनु।
14हेना वरि ईसु हेंयीय मतर तेडिया, “ कनय थरे अलोम लाय बेड़ायू, सींड़ कू मड़ंग रे सखिया गोवाह होयाः लगड हलिते सेनकोःते याजक मी ति:वा। कुड़गा वरि चीकानुअय लगड भगवान मूसा राः दोवारा ते नियामीय एम केडा, हेना राः उनसार ते पुजम एमू।”
15लेकिन ईसु राः चरचा अनावुर मिरिज चलो एना, भीड़ उपर भीड़ हेंय राः टेबोः अँजोम अवुर अपन रोग वरि चीकानुः लगड होड़कू जवर एना। 16हेंडे रेहो हेंय सुनहार जघा रे सेनको: तेय बिनती: दोहो एनु ।
लवका ञेंडताडिया हेंयूय चीकन तेडा
(मत्ती 9:1-8; मरकुस 2:1-12)
17एक दिन एयसा होया एना कि जब ईसु सिकछाय ओवा कू दोहो एनु, हेना रे फरीसी
b कू अवुर नियम चेचेड हेंकू होकू दुडूब तना। नेकू गलील अवुर यहूदी देस राः सींड़ गाँव वरि अवुर एरूसेलेम वरि नेकू मेजताना। ईसु थरे होड़कूय चीकन लगड भगवान राः सक्ति दोहो एना ।
18कुछ होड़कू लवका ञेंडता डिय हेनी होड़ परकोम तेकू अकतेडिया, अवुर हेंकू हेंय भितर रे ईसु मड़ंग रे इदीय लगड कू एमेल तेमेलुः दोहो एनु।
19हेंकू भीड़ राः चलते ते ईसु थरे मेने कू इदी सको गना, तहाँ सड़ीम अगस रे रकब केनते खपरा कू अड़ी तेडा। अवुर परकोम तू सुदा ईसु मड़ंग रेकू अगड़ू तेडिया ।
20तहाँ ईसु हेंकू राः बिसवास ञेंलके तेय कहनी तेडा, “ ए मनवा, अमा: सींड़ पापींञ माफ गोत्तेडा ।”
21हेना वरि फरीसी कू अवुर नियम चेचेड कू मन मन रेकू पसीदें दोहो एनु, “ नेय इया हवे भगवानीय निन्दा यडा ? भगवान छोड़ अवुर इया पाप राः माफी एम सको: तना ?” 22ईसु हेंकू मन - मन रेकू पसींद तेड हेना पपाड़ी केनते हेकूय होंबोर तेडा, “ अपे इंञाः टेबोः रे न याःते ची लगड पे पसींद यडा?” 23अमा: पाप माफ यना मेनाआँ किदो, रिमको: तेम सेन बेड़ाऊ मेनाआँ ? न बनाटंग रे करा टेबोः सेथिया गिआ ? 24अपे पपाड़ी लगाडू इंञ होड़ होपोन धरती रे, पाप माफे लगड हो हँक इदाना ।” हेंय लवका ञेंडता डिया हेंय थरेय कहनी तेडा, “ इंञ अम थरेंञ कहनी यडा, रिमु: मी, अवुर परकोम तम अलगो केते ओड़ा: हनतेम चलोऊ ।” 25तुरेत ते हेंय सींड़कू मड़ंग रेय रिमेना, अवुर गितीज तनय हेना, परकोम अलगो केते भगवानीय बडेय बेड़ा वते, अनेज ओड़ा: हनतेय चलो एना। 26हेना वरि सींड़कू असचरज यन कू, अवुर भगवान कू बडेय वडू अवुर अखीर बोरो यन तेकू कहनी तेडा, “ तेसींञ अबु बडे: काम बू ञेंलकेडा !”
ईसु लेवी चेलाय बनो तेडिया
(मत्ती 9:9-13; मरकुस 2:13-17)
27हेना वरि ईसु बहेरीय उडुंग एना। अवुर लेवी मेनते कू ञुमू तडीय हेनी रोमी सरकार लगड मलगुजारी तिला अय नाका ओड़ा: रेय दुड़ूब तन तोलोगीय ञेंलवा डिया, अवुर हेंय थरेय कहनी तेडा, “ दाव इंञाअय चेलाम बनोः लगड इंञ सुदाम मेजुऊ।” 28तहाँ हेंय सींड़ चीज बगी वते ईसु तयोम तेय सेन तेडा।
29हेना वरि ईसु आदर भोजन लगड, लेवी ओड़ा: तुरे बडे: खावा पिवा लगाडीय रा:तेड कुआ। हेंय सुदा मलगुजारी तिला कुहो अवुर एटा: होड़कू हो, बगरा ते जोमु: कू दुड़ूब तना।
30ञेंलके ते फरीसी कू अवुर फनारीसी कुराः नियम चेचेड कू, चेला कू थरे न या:ते कुरू बुसू केनते कू कहनी तेडा, “अपे मलगुजारी तिला कू अवुर पापी
c होड़कू सुदा ची लगड पे जोमु: - चरो: तना?”
31हेना वरि ईसु हेंकूय जबाब वडा, “डाक्टर चीकन होड़कू लगड मेने, लेकिन हसू को:कू लगड जरूरत पड़ोआ । 32इंञ बेगारींञ पापा मेनते पसींदे: कू इंञाः जरुरत कोवाआ, लेकिन इंञ पाप केडांञ मेनते पसींदेः कू लगड भगवान थरे पाप राः माफी असी वकू लगाडींञ मेजकेना।”
उपास रा: बारे ते ईसु कू होंबोर तेडा
(मत्ती 9:14-17; मरकुस 2:18-22)
33कुछ होड़कू ईसु थरे कू कहनी तेडा, “बतिसमाय एम हेनी यूहन्ना रेनकू चेला कुदो हरदम कू उपास अवुर बिनती दरवारू: तना, अवुर फरीसी कुरेन कू चेला कुहो, लेकिन अमा:कू चेला कू जोमु: चरो: तनाकू।”
34हेना वरि ईसु हेंकू थरेय कहनी तेडा, “जब तक बरातियाकू सुदा दुल्हा दोहोनू, हेंकू अपे का: तेपे एर उपास कुआ ?
35लेकिन हेना दिन मेजुआ, जब दुल्हा
d हेंकू वरिय हिगरो गोगेया, हेन तोलोग हेंकू उपासुआ।”
36
e हेना वरि फेर ईसु हेंकू अवुर मियाँ टंग उदाहरड़ीय लाय वडकूआ, “कनय होड़ नवा: कपड़ा वरि ओड़ेज केते मरी: कपड़ा रे मेने कू टेपीया। नहीं तदो नवाआँ ओड़ेजुआ अवुर हेना टेपी मरीआ सुदा हो एरो सोभा एना।
37अवुर नवाआँ अंगुर
f रस मरीआ खाल राः झोला रे कनय मेने भरोवेआ, कहेकि अंगुर रस खाल राः झोला ओड़ेज केते एंडाआ अवुर झोला हो बरबदुआ ।
38नवाआँ अंगुर रस नानावआँ खाल राः झोला रे भरो केते कू दोहोया ।
39कनय होड़ हो मरीआ अंगुर रस ञुँके वरि नवाआँ मेनेय बेस वआ, कहेकि हेंय कहनियाँ मनारिआ बढ़ियाँ गिआ” मेनते ।
a
5:1
गन्नेसरत - गलील रा: एटा: ञुँमू हवे गन्नेसरस
b
5:17
फरीसी- यहूदी जात रेनकू रा: दल ञुँमू फरीसी मेनते कू कहनी वआ, नेकू भगवान रा: नियम चेचेड हवे
c
5:30
पापी - फरीसी अवुर नियम चेचेड कू गुरू रोमी सरकार लगड टेक्स तिला कू अवुर हेंकु रा: नियम मेने मनो कू पापी मेनते कू कहनी वकू दोहो एनु
d
5:35
दुल्हा - ईसु मसीह अनेज दुल्हा घयतेय लाय यडा, ईसु मसीह चेला कू सुदाया, हेनाते खुस गिआ कू, लेकिन जब ईसु मसीह कू ञेंड गोजेया, अवुर चेला कू दु:ख रेकू पड़ोआ, हेंडे कू उपासुआ
e
5:36
ईसु मसीह पुराना नियम मरिआ कपड़ा घयते अवुर नवा: नियम नवा: कपड़ा घयते उदारड़ीय लाय यडा, पुराना नियम अवुर नवा: नियम बनर मेने खापुआ
f
5:37
नारे मरिआ अंगुर रस रा: मतलोब यहूदी होड़कू रा: मरिआ रिती - बिधी अवुर सिकछा लाय यडा, अवुर नवा: अंगुर रस ईसु मसीह रा: नवा: रिती बिधी अवुर सिकछा लाय यडा,